ব্রেকিং নিউজ
সিলেটি ছড়া ========= আমরার ঘরের গাধা

সিলেটি ছড়া ========= আমরার ঘরের গাধা

—————— —আব্দুল্লাহ আল মামুন

কইলে ডাব, আনে রাব ইতা কিতা গো খালা,

আমারার ঘরের তাইনে করইন বড়ই আলা জ্বালা।

আইজ নু আমরার এক্কেইবারে গুয়া পান নাই,

এর মাঝে দি আইছন বাড়ীত পুবর বাড়ীর ভাই।

কইলাম তাইনরে ও মিয়া ভাই তুরা আছে পান,

একটু খাইলায় গুয়া সোনার ভাই কইরও নারে মান।

দুই দিন ধরি কই তাইনরে আনতা গিয়া সাদা

বিয়ান বেলা গেছলা হাটে আমরার ঘরের গাধা।

বিয়ান গিয়া আইলো বিয়াল ইগুর খোঁজ নাই,

কিগুর গেছে দিছইন বিয়া আর পাইছইন না হাই।

উত্তর বাড়ীর জাবেদ ভাই আছইন ওখন কাতার,

তাইন লগে কত ঘুরছি পুকরিত দিছি হাতার।

তাইন আমারে ভালা পাইতা আছলা জানের জান,

গলার মাঝে ধইরা কইতা তুই কইলজার আধাখান।

হক্কল সময় মনে হয় তাইনরে রাখছি একিটা চিন,

ইটা যখন লাড়িছাড়ি জাভেদ ভাইয়ে খাইন বিন।

কত রাইত কাইন্দা কাইন্দা রইছি আমি হজাগ,

জাবেদ ভাই রে দিছি মন কেউ পাইত নায় ভাগ।

এবার যদি আইওইন দেশে তাইনরে কইমু আমি

কাল্লুয়ারে দিমু তালাক তাইনরে বানাইমু স্বামী।

(৭/৫/২০১৫ খ্রিঃ)

শব্দের অর্থ ও টীকা টিপ্পনীঃ——

************************ তুরা=অল্প, কাল্লুয়া= কানে শুনেনা যে আইওইন= আসেন, পাইত=পাবে লাড়িছাড়ি = নাড়াছাড়া, ইটা=ইহা কইলজার= কলিজা, আছলা= ছিলেন পুকরিত দিছি হাতার=পুকুরে সাতার কাটা, হাই= স্বামী, ইগুর=তার, কিগুর=কার, বিয়ান= সকাল, বিয়াল= বিকাল, পাইছইন=পাওয়া, বড়ই আলা জ্বালা= উল্টো পাল্টা,গেছলা=গিয়েছিল আমরার=আমাদের,গুয়া=সুপারী ইতা কিতা= একি, আইছন= আসছেন তাইন=স্বামী কে ডাকা হয়, কইলে=বললে, আইজ=আজ, ওকন=এখন, আধাখান = অর্ধেক চিন= স্মৃতি চিহ্ন, কইমু=বলব, হক্কল=সকল, রাব=গুড়

Share This:

Leave a Reply

Your email address will not be published. Required fields are marked *

*